ဆိပ်ကမ်းတွင် စုပုံထားသော ကွန်တိန်နာများကိုတွေ့ရစဉ် (ဓာတ်ပုံ−ဂျေမောင်မောင်(အမရပူရ)
စီးပွားရေးလုပ်ငန်း လိုင်စင်နှင့် ခွင့်ပြုမိန့်အတွက် အနည်းဆုံး ကျပ်ငွေငါးသိန်းခန့် လာဘ်ထိုးနေကြရကြောင်း ၂၀၁၄ မြန်မာ့စီးပွားရေးစစ်တမ်းတွင် ဖော်ပြထားသည်။
ကုန်သည်/စက်မှုအသင်းချုပ်၊ အာရှနှင့် ပစိဖိတ်ဒေသစီးပွားရေး နှင့် လူမှုရေးကော်မရှင် (ESCAP) စီးပွားရေး ပူးပေါင်းဆောင်ရွက်မှု နှင့် ဖွံ့ဖြိုးတိုးတက်မှုအဖွဲ့ (OECD) တို့ပူးပေါင်း၍ စီးပွားရေးလုပ်ငန်း ၃၀၀၀ ကို စစ်တမ်းကောက်ယူခဲ့သည်။ အဆိုပါစစ်တမ်းတွင် ထက်ဝက်ခန့်မှာ အမေရိကန်ဒေါ်လာ ၅၀၀ နှင့် ညီမျှသော မြန်မာကျပ်ငွေ ငါးသိန်းခန့်ကို လုပ်ငန်းလိုင်စင်နှင့် ခွင့်ပြုမိန့်များအတွက် ပေးနေရပြီး အချို့မှာ အမေရိကန်ဒေါ်လာ တစ်သောင်း (မြန်မာကျပ်ငွေ သိန်းတစ်ရာ)အထိ ပေးရမှုများရှိနေသည်ဟု စစ်တမ်းက ဆိုသည်။
‘‘ပုံမှန်လုပ်ငန်းတွေကတော့ ပေးစရာမလိုပါဘူး။ ထူးခြားတဲ့လုပ်ငန်းတွေမှာသာ ပေးရတာမျိုးပါ။ လူကြီး နဲ့တွေ့ရပြီဆိုရင်တော့ ထုံးစံအတိုင်း လက်ဆောင်ကတော့ ပေးရတာပေါ့’’ ဟု ပြည်ပသို့ ဆန်တင် ပို့နေသော လုပ်ငန်းရှင် ဦးမျိုးသူရအေးက ဆိုသည်။
ထို့အပြင် လိုင်စင်ခွင့်ပြုမိန့် များနှင့် ပတ်သက်သော လာဘ်ပေးလာဘ်ယူမှုများမှာ ပို့ကုန် ကဏ္ဍမှာထက် သွင်းကုန်များတွင် ပိုများနိုင်ကြောင်း ပို့ကုန်သွင်းကုန် လုပ်ငန်းရှင် ဒေါက်တာစိုးထွန်းက ပြောသည်။
လိုင်စင်လျှောက်ထားရာတွင် စာရွက်စာတမ်းများ လိုအပ်ချက်အခက်ခဲများကြောင့် အောက်ခြေ ၀န်ထမ်း များကို ဘော်ဒါကြေးပေးရမှုများလည်း ရှိနေသည်။
၂၀၁၄ မြန်မာ့စီးပွားရေး စစ်တမ်းတွင် လိုင်စင်ခွင့်ပြုမိန့်များ နှင့် ပတ်သက်၍ စီးပွားရေးသမားများ ကြုံတွေ့နေရသော လာဘ်ပေးလာဘ်ယူမှုများအပြင် ကျွမ်းကျင်လုပ်သားရှားပါးမှု၊ နည်းပညာ ရှားပါးခြင်း တို့ကလည်း အဓိကအဟန့်အတားဖြစ်နေကြောင်း ပါရှိသည်။
စက်ရုံ၊ ရုံးနေရာများသို့ လမ်းပန်းဆက်သွယ်ရေးနှင့် မြေနေရာရရှိမှု အခက်အခဲ၊ ငွေကြေး အခက် အခဲနှင့် ချေးငွေအတိုးနှုန်းမြင့်မားမှု၊ လျှပ်စစ်မီး အပြည့်အ၀ရရှိရန် ခက်ခဲခြင်းတို့ကလည်း အတားအဆီးဖြစ်နေသည်။
ထို့အပြင် စိုက်ပျိုးရေး၊ ၀န်ဆောင်မှုလုပ်ငန်းများဖြစ်သော ကုန်သွယ်မှု၊ သယ်ယူပို့ဆောင်ရေးနှင့် ပုဂ္ဂိုလ်ရေး ၀န်ဆောင်မှုလုပ်ငန်းများတွင် စမ်းသပ်ပြုလုပ်မှုနှင့် ပတ်သက်၍လည်း အနည်းငယ်ကုန်ကျမှုရှိသည်။
ကျွမ်းကျင်လုပ်သား ရှားပါးမှုများမှာ အဓိကအခန်းကဏ္ဍမှ ပါဝင်နေပြီး စစ်တမ်းတွင် စားသောက်ဆိုင် လုပ်ငန်း၊ ကုန်ထုတ်လုပ်မှုလုပ်ငန်းနှင့် အခြားဝန်ဆောင်မှုလုပ်ငန်း၊ စက်မှုလုပ်ငန်း၊ ကုန်သွယ်လုပ်ငန်းတို့ တွင် ကျွမ်းကျင်လုပ်သားရှားပါးမှုမှာ အမြင့်ဆုံးဖြစ်နေသည်။
အလုပ်သမားများကို ခွင့်ပေးမှုနှင့်ပတ်သက်၍ စစ်တမ်းတွင် ၁၅ ရာခိုင်နှုန်းခန့်မှာ အစိုးရရုံးပိတ်ရက်များ၌ ခွင့်မပေးကြပေ။ ခွင့်ရက် ၂၀ ကျော်ကို အဆင့်မြင့်သော စီးပွားရေးလုပ်ငန်းများတွင်သာ ပေးလေ့ရှိသည်။
မြန်မာနိုင်ငံရှိ လုပ်ငန်း ထက်ဝက်ကျော်မှာ ငွေကြေးအကူအညီများ လိုအပ်နေပြီး စစ်တမ်းကောက်ယူ ထားသောလုပ်ငန်းများ၏ ၇၅ ရာခိုင်နှုန်းမှာ ပြင်ပမှ ချေးငွေကို မှီခိုနေရသည်။
ဘဏ်စနစ်သုံးစွဲမှုနှင့်ပတ်သက်၍ လုပ်ငန်းစုစုပေါင်း၏ ၂၀ ရာခိုင်နှုန်းကျော်သာရှိပြီး ၂၇ ရာ ခိုင်နှုန်းမှာ ဘဏ်စနစ်ကို မသုံးစွဲဘဲ ၅၀ ရာခိုင်နှုန်းမှာ ကာလတို ငွေစုစာရင်းသာ သုံးစွဲလျက်ရှိကြောင်း စစ်တမ်းတွင် ဖော်ပြထားသည်။
7Day Daily
0 comments:
Post a Comment