ကျောင်းဖွင့်ပြီ ဆိုလျှင်ဖြင့် သားငယ်၊ သမီးငယ် တို့နှင့် မိဘများ
အမြဲနှစ်ပါးသွား ကြရသည်က ကျောင်းပြန်လာလျှင် အိမ်စာ ကျက်ရန်၊ မှတ်ရန်၊
ရေးသားရန်ဖြစ်သည်။ ကလေးများသည် နံနက်မှ ညနေအထိ ကျောင်းစာများနှင့်
လုံးပန်းခဲ့ရပြီး အိမ်ပြန်ရောက် ချိန်တွင် ကစားလို ကြသည်။ နားလိုကြသည်။
သို့သော် မိဘများက ထိုသို့မဟုတ်။ စာကို ဆက်သင်စေချင် ကြသည်။ ထိုမှစ
ဝိရောဓိအသွင် ပြောင်းလာကြသည်။
အချို့သော ကလေးများက မိဘကိုကြောက်၍ စာလုပ်ရန် ဟန်ပြင်ကြသည်။ အချို့ကဆန့်ကျင်ကြသည်။ ပဋိပက္ခတဖြည်းဖြည်း ကြီးထွားလာသည်။ ဤသို့သော အဖြစ်မျိုးများသည် အိမ်ထောင်စု အတော်များများ ၌ ဖြစ်ပွားတတ်သည်။ သားသမီးကို ပညာတတ်ကြီးများ ဖြစ်ဖို့အရေး မိဘအရေးကြောင့် ပင်ဖြစ်သည်။
ထို့ကြောင့်ကျောင်းစာများနှင့် လုံးပန်းနေရသည့် ကလေးများကို ကျောင်းမှပြန်ရောက်သည်နှင့် အဝတ် အစားလဲစေပြီး ခေတ္တအနားယူခိုင်းပါ။ အဆာပြေမုန့်တစ်ခုခုကျွေးပြီး ကျောင်းတွင် တစ်နေ့တာဖြစ်ပျက် သမျှကိုမေးမြန်းကာ ရယ်မောစရာရှိက အတူလိုက်၍ ရယ်မောပေးပါ။ သူတို့၏ ကလေးသဘာဝအချင်း ချင်း ရန်ဖြစ်သမျှပြောပြလျှင် သေချာစွာနားထောင်၍ ရန်ဖြစ်တာ မကောင်းကြောင်း သေချာစွာရှင်းပြပါ။ ထို့နောက်မှ ယနေ့သင်သမျှစာများတွင် ခက်ခဲသော၊ မရသောစာရှိ၊ မရှိမေးပါ။ အိမ်စာပါလားမေးပါ။
သူတို့လေးတွေ၏ အမောကို
ထိုနည်းများဖြင့် ခေတ္တဖြေဖျောက်ပေးနိုင်ပါက ပိုကောင်း၏။ ထို့နောက်တွင်
အိမ်စာပါလျှင် ရေးခိုင်းပါ။ မပါလျှင် သင်ယူကျက်မှတ်လာသည့် သင်ခန်းစာများကို
ပြန်လည် လေ့ကျင့် ခိုင်းပါ။ အချို့သောကလေးငယ်များသည်
ဉာဏ်ရည်ထက်မြက်သော်လည်း ဝီရိယအားနည်း တတ်သည်။
ထိုသို့သော ကလေးများကို
သူတို့နှစ်သက်သော အစားအစာသို့မဟုတ် စိတ်ဝင်စားစရာ တစ်ခုခုနှင့်
စာဖတ်အောင်ဆွဲဆောင်ပါ။ ဥပမာ “ဒီစာပိုဒ်လေးရသွားရင်၊ ဒီသင်္ချာတွက်ပြီးသွားရင်
မုန့် ကျွေးမယ်၊ ကာတွန်းပေးကြည့်မယ်၊ ဂိမ်းဆော့မယ်” စသည်ဖြင့် ဆွဲဆောင်ပါ။
ဉာဏ်ရည်မထက်သော ကလေးများကိုမူ ဆူပူအော်ဟစ်ကာ စာဖတ်ခိုင်းခြင်းမှ
တတ်နိုင်သမျှ ရှောင်ကြဉ်ပါ။ ထိုကလေးသည် မိဘ၏အော်ဟစ်မှုကြောင့်
စာကိုပို၍ကြောက်သွားလျှင် ဘဝတစ်သက်တာ ခံစားသွားရပေလိမ့်မည်။
သူတို့လေးတွေကို အနားမှမိဘကထိုင်ကာ စာအတူတူကျက်ပေးခြင်း၊
တွက်ပေးခြင်းပြုလုပ်ပေးပါ၊ တတ်နိုင်သမျှ ညင်သာစွာပြောဆိုသင်ပြပေးပါက
မိဘနှင့်အနီးကပ်ထိတွေ့မှုကြောင့်လည်းကောင်း၊ ညင်သာပျော့ပျောင်းသော
သာယာသံကြောင့်လည်းကောင်း စာကျက်ရမှတ်ရ လွယ်ကူမည်ဖြစ်သည်။ စာတစ်ကြောင်းကို
တစ်ခါနှင့်မရလျှင် ထပ်ကာထပ်ကာ ဆိုခိုင်းပါ။ စာမရ၍အော်မငေါက်မိပါစေနှင့်
အဓိကမှာ စာကိုကြောက်မသွားစေရန်ဖြစ်သည်။
ကလေးများ၏ ပင်ကိုဉာဏ်ရည်ဉာဏ်သွေးကို မိဘများကပို၍သိကြပါလိမ့်မည်။ ကိုယ့်ကလေးသူများ ထက်တော်ရန်၊ အတင်းတိုက်တွန်းအားမပေးပါနှင့်။ သူတို့၏ဉာဏ်ရည်မီသမျှကိုလက်ခံပေးပါ။ ဘေးမှ အားပေးပါ။ ကူညီပါ။ သို့မှသာလိုရာပုံသွင်းနိုင်မည်ဖြစ်သည်။ မိဘများ၏ တွန်းအားပေးမှုကြောင့် စိတ်ဖိ စီးမှုများနှင့် ဒုက္ခကြုံရသောကလေးများရှိပါသည်။ ထိုအခါမှ မိဘများထိတ်လန့်ကာ ဘာမှလုပ်မရ တော့၊ အချိန်လွန်မှ နောင်တရသွားကြသူ မိဘများလည်း ဒုနဲ့ဒေးရှိပါသည်။
ထို့ကြောင့် ကျောင်းသားနှင့် မိဘတို့၏ပညာရေးလောဘ လွန်ဆွဲပွဲတွင် မိဘများဘက်က အတင်းလို ရာပုံသွင်းဆွဲယူခြင်းမှ ရှောင်ကြဉ်နိုင်ကြပါစေရန်နှင့် တင်းလွန်းလျှင်ပြတ်တတ်ကြောင်း သတိပေး စကားပြောကြားလိုက်ရပါသည်။
မြန်မာ့အလင်းသတင်းစာ
ဇွန် (၁၈) ရက်၊ ၂၀၁၄ ခုနှစ်
0 comments:
Post a Comment