14 Aug 2014

“ချစ်ဟန်ဆောင်ခြင်း ၊ သေရည်သေရက်သောက်စားခြင်း”


“ချစ်ဟန်ဆောင်ခြင်း ၊ သေရည်သေရက်သောက်စားခြင်း”
•••••••••••••••••••••••••••••••••••••••••••••••••••••••••••

တကယ်မချစ်ဘဲနဲ့ ချစ်ဟန်ဆောင်ပြီး တစ်ဖက်
သားကို အရူးလုပ်မိလို့ တစ်ဖက်သားမှာကိုယ့်ကို
စွဲလမ်းပြီး အရူးတစ်ပိုင်းဖြစ်သွားမယ်ဆိုလည်း
အဲဒီကံကြောင့် ကိုယ်လည်းတစ်ချိန်မှ ရူးသွပ်ရမှာပဲ။
ကိုယ့်ကို စွဲစွဲလမ်းလမ်း တမ်းတမ်းတတ
ဖြစ်သွားမယ်ဆိုတဲ့ရည်ရွယ်ချက်နဲ့
ကိုယ့်ကို ရူးမတက်ချစ်အောင်ဆိုတဲ့စိတ်ထားနဲ့
ဥာဏ်နီဥာဏ်နက်သုံးတာမျိုး ၊မူယာမာယာများတာမျိုး၊
မြူဆွယ်ဖြားယောင်းတာမျိုး၊
လိမ်ညာလှည့်ပတ်တာမျိုးကို ရှောင်ကြဉ်ရပါမယ်။
သူ့စိတ်နဲ့သူ စွဲလမ်းတမ်းတတာကတော့ ကိုယ်နဲ့မဆိုင်ပါဘူး။


တမင် ရည်ရွယ်ချက်ရှိရှိနဲ့ စွဲလမ်းအောင်
လုပ်တာဆိုရင်တော့ စိတ်ထားကိုက
“ရူးစေချင်တဲ့စိတ်ထား”မို့ ၊အဲဒီအကျိုးသက်ရောက်မှုက
ကိုယ့်ဆီလည်း သေချာပေါက်ပြန်ရောက်လာပါလိမ့်မယ်။
(ရူးသွပ်မှုကိုဖြစ်စေတဲ့ အကုသိုလ်ကံ
ဆိုတာ ကတော့ အမျိုးမျိုးဖြစ်နိုင်ပါတယ်။
သူတစ်ပါးကို ရူးသွပ်လောက်အောင် နှိပ်စက်ညှင်းပန်းမယ်၊
စိတ်ဆင်းရဲကိုယ်ဆင်းရဲဖြစ်အောင်လုပ်မယ်ဆိုရင်
အဲဒီကံ အကျိုးပေးတဲ့ဘ၀ ကိုယ်လည်းရူးသွပ်ရမှာပဲ။)

“ရူးသွပ်မှု” ကိုဖြစ်စေတဲ့ အကုသိုလ်ကံတွေထဲမှာ
အဓိကအကျဆုံး၊အကြီးမားဆုံး အကုသိုလ်ကံကတော့
“သေရည်သေရက်သောက်စားခြင်း ” ပါပဲ။
မူးမူးရူးရူးဆိုတဲ့အတိုင်း မူးရင်ရူးတက်သလို၊
မူးနေတာကိုက ရူးခြင်းတစ်မျိုးပါပဲ။
မူးရူးသောက်စား (သို့မဟုတ်)သောက်စားမူးရူး
ဆိုတဲ့ အတိုင်းသောက်စားနေတာဟာ မူးရူးနေတာပါပဲ။

မူးပြီဟေ့ဆိုရင် အရူးတစ်ယောက်လိုပဲ
ဟိုပြောဒီပြောနဲ့ နှုတ်စောင့်စည်းမှုမရှိတော့ပါဘူး။
ပြောသင့်မှန်းမသိ၊ မပြောသင့်မှန်းမသိနဲ့
စွတ်ပြီးပြောတော့တာပါပဲ။
ရူးနေတဲ့လူဘာမှမသိသလို
မူးနေတဲ့သူလည်းဘာမှမသိပါတော့ပါဘူး။

ဒါကိုပဲ သွေးတွေကြွလာပြီး အာသွက်လျှာသွက်နဲ့
စကားပြောလို့ ပိုကောင်းလာတယ်လို့
အရက်သောက်သုံးသူတွေက သဘောကျကြတယ်။
ဆက်ရက်မင်းစည်းစိမ်အဖြစ် သာယာယစ်မူးကြပါတယ်။


ရေချိန်မကျော်သေးလို့ ကိုယ်ပြောတာ
ကိုယ်သိတယ်ပဲထားအုံးတော့ မူးနေတဲ့အချိန်ဟာ
ရူးနေတဲ့အချိန်နဲ့ အတူတူပါပဲ။
ရူးနေတဲ့သူဟာ အမှတ်သညာကင်းမဲ့နေသလို ၊
မူးနေတဲ့သူဟာလည်း အမှတ်သညာကင်းမဲ့နေပါတယ်။
အရက်၊ဘီယာစတဲ့ မူးယစ်စေတတ်တဲ့အရာတွေ
သောက်သုံးနေတာဟာ
●မှတ်ဥာဏ်အားနည်းကြောင်း အကုသိုလ်၊
●ဉာဏ်ထိုင်းကြောင်းအကုသိုလ်
●စိတ်မမှန်ကြောင်း အကုသိုလ်၊
●ရူးသွပ်ကြောင်း အကုသိုလ် ဆည်းပူးစုဆောင်းနေတာပါပဲ။

သူတစ်ပါးကို ဒုက္ခပေးပေးမပေးပေး၊
ကိုယ့်ဘ၀ပျက်ပျက်မပျက်ပျက်၊
အတိုင်းအတာ ရေချိန်ကျော်ကျော်၊
မကျော်ကျော် အရက်ဘီယာ သောက်တိုင်း
ဉာဏ်ထိုင်းစေတဲ့ဓာတ်တွေ၊
မေ့လျော့စေတဲ့ဓာတ်တွေ ဖောက်ပြန်စေတဲ့ ဓာတ်တွေ၊
ရူးသွပ်စေတဲ့ ဓာတ်တွေ ကိုယ်ရဲ့စိတ်အစဉ်မှာ
စွဲကပ်သွားပါတယ်။စုမိသွားပါတယ်။


အရက်သေစာ သောက်စားခြင်းရဲ့
အပေါ့ပါးဆုံးဆိုးကျိုးက
“ရူးသွပ်ခြင်းနဲ့စိတ်ဖောက်ပြန်ခြင်း”လို့
မြတ်စွာဘုရားက ဟောကြားထားတာမို့ မရူးသွပ်သူလိုတိုင်း၊
စိတ်ပုံမှန်ဖြစ်လိုသူတိုင်း အရက်၊ဘီယာစတဲ့
မူးယစ်သေရည်မှန်သမျှကို ဘိန်းဖြူ၊ စိတ်ကြွဆေးပြားစတဲ့
မူးယစ်ဆေးဝါးမှန်သမျှကို လုံးဝရှောင်ကြဉ်ရပါမယ်။


-【ဆရာတော်အရှင်ဆန္ဒာဓိက(ရွှေပါရမီတောရ)】

0 comments:

Post a Comment