အလန်းလေးတွေစားပွဲထိုးတဲ့ ဟွတ်တာစားသောက်ဆိုင်

 

 Hooters (ဟွတ်တာ) အမည်ရှိ အမေရိကန်နိုင်ငံမှ နာမည်ကြီး စားသောက်ဆိုင်ဟာ သူ့ဒေသမှာ စားသောက်ဆိုင်ခွဲ အများအပြား ဖွင့်လှစ်ခဲ့ပြီးနောက်ပိုင်း အခုနှစ်မှာ ပထမဦးဆုံး  ဖွင့်လှစ်လိုက်တာကတော့ ဟောင်ကောင်မြို့မှာ စတင်ခဲ့ကာ လူအများရဲ့ အာရုံစူးစိုက်မှုကိုလည်း ရရှိခဲ့ပါတယ်။

အမေရိကန်စားသောက်ဆိုင်ရဲ့ အရသာတွေကို လူတိုင်း နှစ်သက်မှာမဟုတ်ပေမယ့် Hooters (ဟွတ်တာ)ဆိုင်ကတော့ ၄င်းရဲ့ “ဟွတ်တာ မိန်းကလေးများ”လို့ ခေါ်တဲ့ မလုံ့တလုံဝတ်ဆင်ထားတဲ့ ရင်သားကြီးကြီး၊ လုံးကြီးပေါက်လှ အမျိုးသမီးလေးများက အမေရိကန်အစားအသောက်များနဲ့ ဖျော်ရည်မကာများကို စားပွဲထိုးခြင်းအပေါ်မှာသာ အဓိကဖြစ်ပြီး ဒါကိုလည်း Hooters အမှတ်တံဆိပ်ရဲ့ ဂုဏ်တစ်ခုအဖြစ် ခံယူထားတာပါ။ သေချာတာတစ်ခုကတော့ အဲ့ဒီလိုဆိုင်မျိုးကိုတော့ လူတော်တော်များများ သတိထားမိကြမယ်ဆိုတာ ဧကန်မလွဲပါပဲ။

ဟောင်ကောင်ဟာ ဟွတ်တာဆိုင်များကို တိုးချဲ့ဖွင့်လှစ်နိုင်မယ့် အဓိကကျတဲ့ နေရာတစ်ခုဖြစ်ပြီး ဒါတင်မကပဲ အရှေ့တောင်အာရှနိုင်ငံတွေမှာလည်း နောက်ထပ် ဟွတ်တာ ဆိုင်ပေါင်း (၃၀)လောက်ကို လာမယ့် (၆)နှစ်အတွင်း ဖွင့်လှစ်ဖို့ အစီအစဉ်ရှိတယ်လို့ သတင်းက ဆိုပါတယ်။ နောက်ထပ်ဖွင့်လှစ်ဖို့ ကြံရွယ်ထားတဲ့ ဆိုင်နေရာတွေကတော့ မကာအို၊ ကမ္ဘောဒီးယား၊ အင်ဒိုနီးရှား၊ လာအို၊ မလေးရှား၊ မြန်မာ၊ ဖိလစ်ပိုင်၊ စင်ကာပူ၊ ထိုင်းနဲ့ ဗီယက်နမ်နိုင်ငံများမှာပဲ ဖြစ်ပါတယ်။
နောက်ထပ် ဈေးကွက်ချဲ့ထွင်ခဲ့တဲ့နေရာကတော့ မနှစ်က ဖွင့်လှစ်ခဲ့တဲ့ ထိုင်းနိုင်ငံ၊ ဖူးခက်မှာရှိတဲ့ ဟွတ်တာဆိုင်ပဲ ဖြစ်ပါတယ်။

Hard Rock ကဖေးဆိုင်တို့လို ဘန်ကောက်အခြေစိုက် နိုင်ငံတကာလုပ်ငန်းလုပ်ကိုင်ခွင့်တွေ ရရှိထားတဲ့ Destination အမည်ရှိ အပန်းဖြေစခန်းမှ အမှုဆောင်အရာရှိဖြစ်သူ Gary Murray က “ဖူးခက်မြို့က ဟွတ်တာဆိုင်ကို ဖွင့်လှစ်လိုက်ချိန်မှာတော့ အာရှတခွင်မှာလည်း ဟွတ်တာဆိုင်များကို ထပ်မံတိုးချဲ့ဖွင့်လှစ်ဖို့ အလားအလာ အရမ်းကောင်းနိုင်ကြောင်း ကျွန်တော်တို့တတွေ သိရှိ လိုက်ရပါတယ်”လို့ ဆိုပါတယ်။

အမေရိကန်နိုင်ငံ အတ္တလန်တာ အခြေစိုက် Hooters ကုမ္ပဏီ ရုံးချုပ်ရဲ့ ဖော်ပြချက် တစ်ခုမှာတော့ “ထိုင်းနိုင်ငံမှာ Hooters ဆိုင်များကို ဆက်လက်များပြားအောင် လုပ်ဆောင်သွားပြီး နောင်လာမယ့် နှစ်တွေမှာလည်း ဟောင်ကောင်နဲ့ ဖိလစ်ပိုင်နိုင်ငံများမှာ ဖြစ်မြောက်အောင်မြင်ဖို့ ငွေပင်ငွေရင်းရော၊ အရင်းအမြစ်တွေကိုပါ မြုပ်နှံသွားမယ်” လို့ ရေးသားထားပါတယ်။

ဒါ့အပြင် နာမည်ကျော် ဗြိတိသျှ စားဖိုမှူးများဖြစ်တဲ့ ဂျေမီ အိုလစ်ဗာနဲ့ ဂေါ်ဒန် ရမ်ဆေးတို့ဟာ သူတို့ရဲ့ စားသောက်ဆိုင်တွေကို ပြီးခဲ့တဲ့နှစ်က ဟောင်ကောင်မှာ ဖွင့်လှစ်လိုက်တာဟာ နိုင်ငံတကာ လုပ်ငန်းလုပ်ပိုင်ခွင့်ကို ရယူဖွင့်လှစ်လိုက်နိုင်ခြင်းလည်းဖြစ်ပါတယ်။

 (၂၀၀၄)ခုနှစ် တရုတ်နိုင်ငံ ရှန်ဟိုင်းမြို့မှာ ဟွတ်တာဆိုင် စတင်ဖွင့်လှစ်စတုန်းကတော့ ဟွတ်တာဆိုင်နဲ့ ပတ်သက်တဲ့ အယူအဆတွေဟာ အာရှအတွက်တော့ အစိမ်းသက်သက်လိုဖြစ်နေ တာပါ။

အဲ့ဒီနောက်မှာတော့ ရှန်ဟိုင်းမှာနောက်ထပ် ဆိုင်နှစ်ဆိုင်ဖွင့်လှစ်ခဲ့ပြီး ဘေဂျင်း၊ ချန်ဒူးနဲ့ ဇီယန်မြို့များမှာလည်း အသီးသီးဖွင့်လှစ်ခဲ့ပါတယ်။ (၂၀၁၀)ခုနှစ်တွင် ဂျပန်နိုင်ငံမှာ ဆိုင်ခွဲဖွင့်လှစ်ခဲ့ပြီး တောင်ကိုရီးယားနဲ့ ထိုင်ဝမ်နိုင်ငံတွေမှာလည်း ဖွင့်လှစ်ခဲ့ပါတယ်။

ဟွတ်တာဆိုင်ကို အမေရိကန်နိုင်ငံ ဖလော်ရီဒါ ပြည်နယ်မှာ ပထမဆုံးအကြိမ် စတင်ဖွင့်လှစ်ခဲ့ချိန်က စလို့ ဟွတ်တာ ကုမ္ပဏီဟာ အမျိုးသမီးများကိုသာ စားပွဲထိုးအဖြစ်ငှားရမ်းတဲ့ မူဝါဒအပါအ၀င် တခြားသော အမှုပေါင်းများစွာအတွက် တရားစွဲဆိုမှုတွေ ရှာဖွေထောက်လှမ်းခြင်း အမျိုးမျိုးတွေနဲ့ ရင်ဆိုင် ကြုံတွေ့ခဲ့ရတာပါ။

(၂၀၀၃)ခုနှစ်မှာတော့ Hooters Air လို့ခေါ်တဲ့ လေကြောင်းလိုင်းကို စတင်ခဲ့ပြီး သက်တမ်း (၃)နှစ်သာကြာရှည်ခံခဲ့ပါတယ်။

အဲဒီကနေမှ  ဟွတ်တာဆိုင်များဟာ အစပြုခဲ့ပြီး အခုအခါတွင် နိုင်ငံပေါင်း (၂၇)နိုင်ငံမှာ ဆိုင်ပေါင်း (၄၀၀)ကျော်ဖြင့် အောင်မြင်လျက်ရှိလို့နေကာ အခုတော့ ဟောင်ကောင်မြို့ကို ရောက်ရှိလာပြီဖြစ်ပါတယ်။ ဟောင်ကောင်ဆိုတာလည်း အစားအသောက်နဲ့ ဖျော်ဖြေရေး အစီအစဉ်တွေ ပေါများလှတဲ့အပြင် အခန်းငှားခတွေလည်း ဈေးမြင့်လာတာမို့ ဟွတ်တာ ရဲ့နောက်ဆုံး စွန့်စားခန်းက အောင်မြင်မလား၊ ကျဆုံးမလားကတော့ အချိန်က စကားပြောပါလိမ့်မယ်။

ခင်အေးမြလွင်
ကိုးကားသတင်း။ ။ http://www.scmp.com/news/hong-kong/article/1694283/happy-hour-just-got-happier-hooters-open-hong-kong-amid-brand-push 

Hooters Restaurant က စားပွဲထိုးကောင်မလေးတွေရဲ့ ၀န်ဆောင်မှုများကို ဧရာဝတီဘလော့ဂ် ပရိတ်သတ်များ အောက်ပါယူကျူ လင့်ခ်မှာ ကြည့်ရှုနိုင်ပါကြောင်း..။

 

 

https://www.youtube.com/watch?v=-TCeiv2J62k

 

http://blog.irrawaddy.org/2015/02/blog-post_3.html

Posted in: သတင်း