ဘင်ဂျမင် ဗွန်ဝေါင်သည် စိတ်ကူးဆန်းသစ်သည့် စွယ်စုံရ ဓာတ်ပုံဆရာ တစ်ဦးအဖြစ် နာမည်ရနေသူ တစ်ဦးဖြစ်သည်။ အင်ဒိုနီးရှားနိုင်ငံ၊ ဘာလီကျွန်းအနီးရှိ ပင်လယ်ကြမ်းပြင်အောက် သင်္ဘောပျက်ကြီး တစ်စင်းတွင် ဘင်ဂျမင်နှင့် ၎င်း၏အဖွဲ့ ဖန်တီးခဲ့သော ရေအောက်ဓာတ်ပုံများမှာမူ ဒဏ္ဍာရီဆန်ဆန် ပုံရိပ်မျိုးသဖွယ် လူအများ၏ အာရုံကို ဖမ်းစားနိုင်ခဲ့သည်။ ဘင်ဂျမင်တို့ အဖွဲ့သည် သရုပ်ပြမော်ဒယ်လ် မိန်းကလေးများကို ရေနက်ပိုင်း သင်္ဘောပျက်ကြီးတွင် ကိုယ်ဟန်ပြစေပြီး ဆန်းကျယ်လှပသည့် ရှုထောင့်များမှ ဓာတ်ပုံကောင်းများ ရိုက်ယူခဲ့ခြင်း ဖြစ်သည်။
အဆိုပါ ရိုက်ကူးရေး လုပ်ငန်းစဉ်ကို ဘင်ဂျမင်က YouTubeတွင် လွှင့်တင်ခဲ့ရာ လူအများ၏ ချီးကျူးမှုကို ခံယူခွင့် ရခဲ့သည်။ အရောင်ရင့်ရင့် ပင်လယ်ရေအောက် ရှုခင်းကို နောက်ခံထားကာ အဖြူရောင် ဂါဝန်ရှည်နှင့် မော်ဒယ်လ်များ၏ ပုံရိပ်ကို ဘင်ဂျမင်က အမိအရ ကြိုးစား ရိုက်ယူခဲ့ခြင်း ဖြစ်သည်။ ယင်းရိုက်ကွင်းအတွက် ရေငုပ်သမားများ၏ အကူအညီကို ရယူခဲ့ရသလို ဓာတ်ပုံအဖွဲ့သားအားလုံး အလွန်တရာ အားစိုက်ခဲ့ရကြောင်း သိရှိရသည်။ ဘင်ဂျမင်က ၎င်း၏ စိတ်ကူးစိတ်သန်းများ ဆန်းသစ်ခြင်းနှင့် ပတ်သက်၍လည်း ကိုယ်ပိုင်အမြင်ကို ပြောဆိုခဲ့သေးသည်။
“ကျွန်တော် အချိန်တွေ အကြာကြီး လေ့လာခဲ့တဲ့နောက် သေချာပေါက် သိရှိလာတာက အကောင်းဆုံး ရလဒ်တွေ ဆိုတာက အတော်ဆုံးဆိုတဲ့ ပညာရှင်တွေဆီကချည်း ထွက်ပေါ်လာတတ်တာ မဟုတ်ဘူး ဆိုတာပဲလေ။ အထိရောက်ဆုံး ရည်ရွယ်ချက်ကို ဖမ်းဆုပ်မိလိုက်တဲ့ လူတစ်ယောက်ရဲ့ စိတ်အတွေးကသာ တန်ဖိုး အရှိဆုံး ဖြစ်ပါတယ်”ဟု ဘင်ဂျမင်က ဆိုသည်။ ၎င်းက “ကျွန်တော့် ဓာတ်ပုံရိုက်ကွင်းတွေမှာ ပါဝင်တဲ့ သူတွေက တကယ့်ကို နှစ်နှစ်ကာကာ စိတ်အားထက်ထက်သန်သန် ကူညီချင်ကြတာကလည်း ကျွန်တော့်အတွက် အားတစ်ရပ်ပါပဲ”ဟုလည်း ပြောကြားသွားခဲ့သည်။
0 comments:
Post a Comment