(တိုးမောင်)
ကျွန်တော် မကြာသေးမီက ပဲခူးတိုင်း တိုင်းဒေသကြီး ဝန်ကြီးချုပ် ပဲခူးရွှေမော်ဓော ဘုရားပေါ်ကို ဘုရားတက်ဖူးပုံနဲ့ အမျိုးသားခေါင်းဆောင်ကြီး ဗိုလ်ချုပ်အောင်ဆန်းရဲ့ ရွှေသာလျောင်း ဘုရားဖူးပုံ နှစ်ခုကို နှိုင်းယှဉ်ပြီး ရေးမိပါတယ်။ စကတည်းက နှိုင်းယှဉ်ပြောမိတာကို တောင်းပန်ပြီးသား။ မိတ်ဆွေတွေက မနှိုင်းသင့်တာ နှိုင်းရမလား ဆိုပြီး ဖုန်းနဲ့ အပြစ်တင်ကြတယ်။ ကျွန်တော်ကတော့ ရိုးသားစွာ ယှဉ်ပြမိတာကို မှားရင် ခွင့်လွှတ်ဖို့ တောင်းပန်ရုံက လွဲပြီး ဘာမှ မတတ်နိုင်ပါဘူး။
ကိစ္စက ပြီးသွားပြီလို့ ထင်နေချိန်မှ မေလ ၁၆ ရက်နေ့ထုတ် နိုင်ငံတော်ပိုင် သတင်းစာတွေကနေ ကဆုန်လပြည့် ဝန်ကြီးချုပ်နဲ့အဖွဲ့ ညောင်ရေသွန်းလောင်းတာကို သတင်းမှားနဲ့ တုံ့ပြန်ပြီး ပြည်သူကို ထပ်စော်ကားတော့ ဒီတစ်ကြိမ်မှာ ပြည်သူ့နားရွက်ကို တံတွေးဆွတ်ရုံသာမက ပြည်သူ့မျက်နှာကို မီဒီယာက တစ်ဆင့် တံတွေးနဲ့ ဝိုင်းထွေးလာတဲ့အတွက် မခံချင်စိတ်နဲ့ ထပ်ရေးမိပါတယ်။
ဒီနေရာမှ အဲဒီနိုင်ငံပိုင် သတင်းစာကနေ ဖော်ပြထားတဲ့ ဂေါပက အတွင်းရေးမှူး ဦးကြည်ဝင်း ဆိုသူရဲ့ ပြောကြားချက်ကို ထပ်လောင်း တင်ပြလိုပါတယ်။
“ဝန်ကြီးချုပ်တို့က ကားပါကင်မှာ ရပ်ပြီး စေတီရင်ပြင်တော်ကို ခြေလျင် ပတ်တက်တာပါ။ ဒီနှစ် ဝန်ကြီးတွေရော၊ တိုင်းဒေသကြီး အစိုးရအဖွဲ့ တာဝန်ရှိသူ တော်တော်များများ လာကြပါတယ်။
အဲဒါကြောင့် ကားများသွားပြီး တန်းစီသလို ဖြစ်သွားတာပါ။ ဝန်ကြီးချုပ်ကား ပြန်အဆင်းမှာ ရှင်လောင်း လှည့်လာတာကို တွေ့လို့ ဦးစားပေးလိုက်တော့ ကားတွေက တန်းစီသလို ဖြစ်သွားတာပါ။ သက်ကြီးရွယ်အို လမ်းမလျှောက်နိုင်တဲ့ သူတွေကိုလည်း ဂေါပကရုံးရှေ့မှာ ကားခဏ ရပ်နားထားဖို့ ခွင့်ပြုပေးထားတာ ရှိပါတယ်။ ကားတွေက ကျောက်ပန်းတောင်း ဓမ္မာရုံရှေ့မှာ ကားကျပ်နေလို့ ဒီလိုဖြစ်သွားတာပါ။
ကျန်အချိန်တွေမှာ ကားမဝင်ရ ဆိုပြီး ပိတ်ထားပါတယ်။ ဒါပေမဲ့ ဂေါပကကို သတင်းပို့တဲ့အခါ ဥပမာ အရေးကြီးတဲ့ နိုင်ငံခြားဧည့်သည်တွေ လာမယ် ဆိုရင်လည်း ခွင့်ပြုပေးထားပါတယ်။ ကားနဲ့ စေတီရင်ပြင်အထိ တက်တယ်လို့ အင်တာနက်မှာ ပျံ့နှံ့နေတာ တကယ်ကို ကြားလို့ မကောင်းပါဘူး။ အကြောင်းအရာကို သေချာမသိတဲ့ ပြည်သူတွေက အထင်လွဲကြမှာပေါ့။
ဒီလို မဟုတ်မမှန် လုပ်ကြံ ပြောကြတာကို ရပ်တန်းက ရပ်စေချင်ပါတယ်” တဲ့ဗျာ။ ကဲ ဘုရားဂေါပကပါ ပြည်သူကို စစ်လေသံနဲ့ ခြိမ်းခြောက်လာတာ ကြားလို့မှ တော်သေးရဲ့လား။
ပြီးတော့ သတင်းမှာ “မြောက်ဘက်မုခ်မှ ဝန်ကြီးချုပ်နှင့်အဖွဲ့ စတင် တက်ရောက်လာစဉ်” ဆိုပြီးတော့ ကော်ဇောနီပေါ်ကို လျှောက်လာတဲ့ တိုင်းဝန်ကြီးချုပ်ကို ဓာတ်ပုံနဲ့တကွ ဝါဒဖြန့်ပြီး ရှေ့နေ လိုက်ပေးထားတာလည်း တွေ့ရတယ်။
ဒီနေရာမှာ မေးစရာ ဖြစ်လာတာက ကဆုန်လပြည့်နေ့က Facebook ပေါ်မှာ တက်လာတဲ့ ဘုရားရင်ပြင်တော်ပေါ်က ကားတန်းကြီးဟာ လုပ်ကြံတာလား။ ဝန်ကြီးချုပ်ကို သိက္ခာချချင်လို့ Photoshop နဲ့ ဖြတ်ညှပ်ကပ် လုပ်ပြီး ဖန်တီး တင်ထားတာလား မေးစရာ ဖြစ်လာတယ်။ မျက်မြင်သက်သေတွေ၊ ဓာတ်ပုံတွေ ရိုက်ပြီး မှတ်တမ်းတင်ထားသူတွေဟာ အလကား ပြည်သူတွေ။ လုပ်ကြံသူတွေ။
ရပ်တန်းက ရပ်ရင်ရပ် မရပ်ရင် တစ်ခုခုအရေးယူတာ ခံရတော့မယ့်သူတွေ အလိုလို ဖြစ်သွားပြီပေါ့။ ဒီခေတ်ဟာ ဆိုရှယ်ကွန်ရက်ခေတ်။ ပြည်သူ့သတင်းသမားခေတ် ဆိုတာကို မေ့နေပုံ ရပါတယ်။
သတင်းသမားတွေ အဖာကောင်းတာကို ပြောရဦးမယ်။ ဒီဝန်ကြီးချုပ်ပဲ ပဲခူးရေကြီး ရပ်ကွက်တစ်ခုမှာ ရေဘေး ဒုက္ခသည်တွေကို လိုက်ကြည့်တော့ လှေပေါ်မှာ အမြိန့်သားထိုင်ပြီး ဘေးက တွန်းပေးတာကို ခံနေတာ နောက်တစ်နေ့မှာ အင်တာနက်ပေါ် တက်လာပြန်တယ်။
ဒါကိုလည်း ဝန်ကြီးက ရေထဲမှာ လမ်းလျှောက်ပြီး လိုက်ကြည့်တာပါ ဆိုတာကို နောက်နေ့တွေမှာ သတင်းထဲ ပြန်ထည့်ပြီး ပုဆိုးလေး မထားတဲ့ ဝန်ကြီးချုပ်ပုံကို ပြန်ထည့်ပြန်တယ်။
ကျွန်တော်တို့ မြန်မာနိုင်ငံမှာ သတင်းမီဒီယာ လွတ်လပ်ခွင့်နဲ့ အတူ ပြည်သူတွေကို အဖြစ်မှန်အတိုင်း ပြောသင့် ပြောထိုက်တာတွေ မပြော၊ တင်ပြသင့်တာတွေကို မတင်ပြလို့ ဆိုရှယ်ကွန်ရက်လို့ ခေါ်တဲ့ Facebook လို နေရာတွေဟာ သတင်းဖြန့်ချိမှု အကောင်းဆုံး၊ လူကြိုက်အများဆုံး ဖြစ်လာခဲ့ရတာပါ။
သတင်းသမား တစ်ယောက်ရဲ့ တာဝန်ဟာ အဖြစ်မှန်ကို တင်ပြနိုင်ရမယ်။ အစိုးရနဲ့ ပြည်သူကြားမှာ ပေါင်းကူးပေးနိုင်သူ ဖြစ်ရမယ်။
အကြောင်းခြင်းရာသစ်တွေကို လူထုဆီ အသိပေး တင်ပြနိုင်ရမယ်။ လူတွေကို ပညာပေးဖို့၊ ဖျော်ဖြေဖို့၊ ရှင်းလင်းတင်ပြဖို့ တာဝန်ယူရမယ်။ လူထုရဲ့ အကျိုးစီးပွားကို ကာကွယ်စောင့်ရှောက်ရမယ် ဆိုပြီး မှတ်သားဖူးပါတယ်။ သတင်းသမားတွေဟာ သတင်းမှန်ကို သတင်းမှားလို့ ဖာထေး ပြောဆိုခွင့် မရှိဘူး။ ပြင်ဆင်ခွင့် မရှိဘူး။ သတင်းသမား ကျင့်ဝတ် ဆိုတာလောက်ကိုတော့ နားလည်သင့်ပါတယ်။
မင်းတုန်းမင်းကြီးတောင် ငါမကောင်းရင် ငါ့ကိုရေးလို့ ခွင့်ပြုပေးခဲ့သေးတာ။ ဒါတောင် ပဒေသရာဇ်ခေတ်။ ဒီမိုကရေစီခေတ်ကျမှ ငါ့အဘ မကောင်းတာကို ငါကောင်းအောင် ပြန်ရေးမယ်ဆိုရင် သတင်းအပေါ် သစ္စာဖောက်၊ ပြည်သူကို ဗြောင်လိမ်ဇာတ် ခင်းတာပဲ ဖြစ်တော့မယ်။
ဝန်ကြီးက မှားသွားတယ် ဆိုရင်လည်း (ပြည်သူကို အလေးထားပြီး လေးစားတဲ့သူမျိုး ဖြစ်ရင်) မှားသွားပါတယ်လို့ တောင်းပန်လိုက်တာနဲ့ ပြီးသွားနိုင်တဲ့ ကိစ္စကို ကြားကနေပြီး ဂေါပကတွေနဲ့ သတင်းစာတွေကနေ အမှားတွေပါ ဆိုပြီး ထုတ်ပြန်နေတာကတော့ ဝန်ကြီးကိုယ်စား ပြည်သူ့မျက်နှာကို တံတွေးနဲ့ လာထွေးနေသလို ခံစားရပါတယ်။
ဒါမှမဟုတ် ဘာမှ မဖြေရှင်းဘဲ (မြန်မာပြည်ရဲ့ ထုံးစံအတိုင်း) ဒီအတိုင်း နေလိုက်လည်း ဖြစ်တာကို အစိုးရဘက်တော်သား မီဒီယာနဲ့ ဂေါပကတွေကို ဓားစာခံလုပ်ပြီး ပြည်သူကို စော်ကားမှုတွေတော့ မလုပ်သင့်ဘူး ထင်ပါတယ်။
(တိုးမောင်)
(ဤကဏ္ဍပါ ဖော်ပြချက်များသည် စာရေးသူ၏ အာဘော်သာ ဖြစ်ပြီး The Voice ၏ အာဘော်မဟုတ်ပါ)
The Voice Weekly
0 comments:
Post a Comment