မြန်မာ စကားပုံ တစ်ခု ရှိ ပါတယ်။ သူကတော့ တိုတိုနဲ့ ရှင်းရှင်းလေးပါ။ 'လာမယ့်ဘေး ပြေးတွေ့' လို့ ခေါ် ပါတယ်။
သူရဲ့ ဆိုလိုရင်းက ရိုးရှင်းပါတယ်။ မိမိ ရင်ဆိုင် ကြုံတွေ့ ရမယ့် အခက်အခဲကို ထိုင်စောင့် မနေပဲ သွားတွေ့ပါ လို့ ဆိုခြင်း ဖြစ်ပါတယ်။ တကယ်မှန်ပါတယ်။ ဘဝမှာ ကျနော်တို့ဟာ တစ်ခါတစ်လေ အခက်အခဲတွေ ရင်ဆိုင် ကြုံတွေ့ ရပါတယ်။ ယင်းအခက်အခဲကို ကြုံရမယ်ဆိုတာကို ကြိုသိနေသည့်တိုင် စိုးရိမ် ပူပန်မှုတွေ များပါတယ်။ ကြုံတွေ့ ပြီးသွားတဲ့ အချိန် ဒါတွေကို ပြန်စဉ်းစား ကြည့်လိုက်တဲ့ အခါ အရင်က စိတ်ပူခဲ့တာတွေက ဘာမှ မဟုတ်ပါလား ဆိုတာကို မြင်လာ သိလာမှာ ဖြစ်ပါတယ်။ ဒါကြောင့် အခက်အခဲ ပြဿနာ ကြုံတွေ့လာရင် စိုးရိမ် ပူပင်သောက ကို ဖယ်ထားပြီး ပထမဦးဆုံး အနေနဲ့ ဘယ်လို ရင်ဆိုင် ဖြေရှင်း သင့်တယ် ဆိုတာကို အဖြေ ထုတ်ရ ပါမယ်။ ကိုယ့်ဆီမှာ ဖြေရှင်းဖို့ နည်းလမ်း လုံးဝ မရှိတော့ ဘူး ဆိုရင် ရလာမယ့် ဆိုးကျိုး၊ ကောင်းကျိုးတွေကို ခံစားရုံပါပဲ။ ပြီးရင် ဒါတွေဟာ အတိတ်မှာ ကျန်ခဲ့ မှာပါ။
ဒီတော့ ရင်ဆိုင်ဖို့ ရှိနေရင် ထိုင်နေမယ့် အစား၊ ရပ်နေပြီး ပူပန် နေမယ့် အစား မိမိထံ ဦးတည် လာနေတဲ့ ပြဿနာကို ကိုယ်က အဆင်သင့်ပြင် ရှေ့တိုး ရင်ဆိုင်ရုံသာ အကောင်းဆုံး နည်းလမ်း ဖြစ်ပါတယ်။ တိုက်ပွဲမှာ အောင်နိုင်မှာ သတ္တိရှိသူလို့ မမည် ပါဘူး။ ဒုက္ခကို အပြုံးမပျက် ရင်ဆိုင်ပြီး ခုခံသွားခြင်းကလည်း သတ္တိ တစ်မျိုးပဲ ဖြစ်ပါတယ်။
မယောင်ရာ ဆီလူး
နောက်ထပ် မြန်မာ စကားပုံ တစ်ခု ကတော့ 'မယောင်ရာ ဆီလူး' ပါ။ ယင်းစကားပုံက တစ်ကမ္ဘာလုံးမှာ ရှိတဲ့ နိုင်ငံရေး လောကပေါ် သက်ရောက်မှု အများကြီး ရှိပါတယ်။ အထူးသဖြင့် ဖွံ့ဖြိုးတိုးတက်ဆဲ နိုင်ငံတွေမှာ ဖြစ်ပါတယ်။
အနာ တစ်ခြား ဆေး တစ်ခြား ဆိုသလို ပါပဲ။ ယောင်နေ၊ နာနေတာက တစ်ခြား၊ လိမ်းလိုက်တဲ့ ဆေးက တစ်ခြား ဖြစ်နေတော့ အနာက ဆက်နာနေတဲ့ အပြင် ဆေးကြောင့် မနာတဲ့ နေရာက ပူရှိန်းရှိန်းနဲ့ နေရ ခက် ပါတယ်။ ယနေ့မှာလည်း ဒီလိုပါပဲ။ တိုင်းပြည်မှာ လိုအပ်နေတဲ့ နေရာ၊ နာနေတဲ့ နေရာက တစ်ခြား၊ ပြန်လည် ပြုပြင် ထိန်းကြောင်း ပေးတဲ့ နေရာက တစ်ခြား ဖြစ်တဲ့ အခါ အကျိုး သက်ရောက်မှု မရှိပဲ အားလုံး နစ်နာ ရ ပါတယ်။
ယနေ့ အချိန်အထိလဲ မယောင်ရာ ဆီလူး ဆိုတဲ့ မြန်မာ့ စကားပုံဟာ မှန်ကန် အကျုံးဝင် နေဆဲ ဖြစ်တာမို့ စာဖတ်သူတို့ စိတ်ထဲမှာ ရှိနေတဲ့ မယောာင်ရာ ဆီလူး အကြောင်း အရာ ဥပမာ များကို မျှဝေ ပေးနိုင် ပါတယ်။
.
အောင်ခမ်း (ရိုးရာလေး)
0 comments:
Post a Comment