တစ်နေ့မှာ မသေနဒီကောသလမင်းဟာ ဗိုက်တင်းအောင်စားပြီး ဘုရားထံတရားနာရန်သွားခဲ့တယ်။ သူစားတဲ့ထမင်း ပမာဏကလည်း ခုခေတ်ကမ္ဘာ့အစားပြိုင်ပွဲမှာ ပြိုင်ပွဲဝင်စားမယ့် ပမာဏထက် များစွာသာလွန်ပါတယ်။ အမြဲတမ်း ထမင်းကို ဆွဲပုံးအပြည့်၊ ဟင်း၊ အချိုပွဲအပြည့်ဖြင့် စားသုံးလေ့ရှိတယ်။ အဲလိုစားသောက်ပြီး ဘုရားထံတရားသွားနာတဲ့အခါ ခန္ဓာကိုယ် ပင်ပန်းလေးလံပြီး တရားအစမှာပဲ ခေါင်းတဆတ်ဆတ်နဲ့ ငိုက်တော့တာပါပဲ။ ဒီတော့ ဘုရားရှင်က မေးတယ် "ဒကာမင်းကြီး၊ အနားမယူပဲနဲ့များ လာခဲ့လေသလား? မဟုတ်ပါဘူးဘုရား တပည့်တော်ဒီလိုပဲ အစားစားပြီးတိုင်း ခုလို ငိုက်ချင်စိတ်လွမ်းမိုးနေ တယ်ဘုရား။
"မင်းကြီး ပျင်းရိငိုက်မျဉ်းပြီး အစားကို အလွန်အကျွံစား၍ ၀က်လိုပဲ တလူလူအိပ်လေ့ရှိသူဟာ (မမြဲခြင်းစတဲ့ သဘောတရား ကို မဆင်ခြင်နိုင်တဲ့အတွက်) အဖန်ဖန် အမိဝမ်း၌ ပဋိသန္ဓေနေရတယ်"
"မှန်ပါဘုရား။"
နောက်တော့ ဘုရားရှင်က ဥတ္တရမင်းသားလေးကို ကောသလမင်းကြီး ထမင်းစားခါနီးတိုင်း စာလေးတစ်ခု ရွတ်ဆိုဖို့ သင်ပေးလိုက်ပါတယ်။
"သတိရှိပြီး အစားအစာကို စားသင့်တဲ့အတိုင်းအရှည်အားလျှော်စွာ စားသုံးလေ့ရှိသူဟာ ငိုက်မျည်းခြင်းစတဲ့ ဆင်းရဲတွေ တဖြည်းဖြည်းပါးလာလိမ့်မယ်။ အရွယ်တင်မယ်။ အသက်ရှည်မယ်"
ဥတ္တရမင်းသားလည်း ဘုရားပြောတဲ့အတိုင်း ထမင်းစားခါနီး အထက်ပါစာလေးကို ရွတ်ဆို သတိပေးတဲ့အခါ ကောသလ မင်းကြီးလည်း အစားကို နည်းနည်းချင်း လျှော့စားလာပါတယ်။ တစ်ပတ်ပြည့်တော့ စောစောက ပျင်းရိငိုက်မျည်းတဲ့ ခံစားမူတွေ မရှိတော့ဘူး။ ကိုယ်လည်း တက်ကြွလာတယ်။ နောက်တော့ ခန္ဓာကိုယ်ဟာ ၀ိတ်ကျပြီး ကြည့်ကောင်းရှုကောင်းဖြစ်လာပါတော့ တယ်။ ဒီတော့မှ ကောသလမင်းကြီးလည်း စိတ်ချမ်းသာမှုကို ခံစားရပါတော့တယ်။
ဘုရားရှင်က ကိုယ်ခန္ဓာကျန်းမာသန်စွမ်းစေဖို့အတွက် အစားကို ဆင်ခြင်ဖို့ နည်းပေးတော်မူပါတယ်။ အစားအသောက်ရဲ့ အတိုင်းအရှည်ကို သိရမယ်။ စားကောင်းကောင်းနဲ့ ဗိုက်တင်းအောင်စားရင် မအီမသာဖြစ်တယ်။ အဆီပွားတယ်။ ကိုယ်ခန္ဓာလေးလံလာပြီး ငိုက်မျည်းခြင်းတွေ ၀င်လာတယ်။ ဒါကြောင့် အစာစားတဲ့အခါ ဗိုက်ထဲရေတစ်ခွက်စာချန်ပြီးစားပါ။ ပြည့်အောင်မစားပါနဲ့တဲ့။ စားတဲ့အခါမှာလည်း ချို၊ ချဉ်၊ ဖန်၊ ခါး၊ စပ်၊ ငန် အရသာစုံမျှအောင် စားပါ။ ခေတ်ကာလနည်းကတော့ နည်းနည်းနဲ့ ခဏခဏစားပေးတာ ကျန်မာရေးအတွက် ကောင်းတယ်လို့ပြော ပါတယ်။ နောက်ပြီး မစားသင့်တဲ့အစာများကတော့ မတည့်စာ၊ အားနာစာ၊ နှမြောစာများ ဖြစ်ပါတယ်။
ဒါကြောင့် စာရှုသူများ အရွယ်တင်နုပျိုဝိတ်ကျလိုတယ်ဆိုရင်တော့ ဘုရားဟောတဲ့ သတိဆေးနဲ့ အစားကို ဆင်ခြင်စားဖို့ လိုပါတယ်။
ရွှေစမ်းမြေ အရှင်က၀ိဓဇသာရ
0 comments:
Post a Comment